غمون علینی ایلدی غم آشناسی فاطمه

گَتوردی تنگه سینمی باشون بلاسی فاطمه


غمون علینی ایلدی غم آشناسی فاطمه

گَتوردی تنگه سینمی باشون بلاسی فاطمه

بو رسمیدور که اهل دل دل اهلینون سسین تانور

دلیمده سسلورم آدون دل ملائک اودلانور

جواب ویر بو بی کسه اورگیمون باشی یانور

دانیش که تا اله گَله اورک رضاسی فاطمه

علینون حقّی وار اگر هی آغلیوب ملول اولا

فنا جهاندا قورخورام بو زندگیده طول اولا

قالینجا کاش تیز اُلم مرام دل حصول اولا

که یوخدی سنسیز عالمین منه وفاسی فاطمه

گونوزلر ایوده اگلشوب یانان قاپینی باغلارام

یتیم اوشاقلاریم باخار دیزلریمی قوجاقلارام

هامی ایوده گیدن زمان گَلوب بقیعده آغلارام

بقیعده سنله دفن اولوب ایویم صفاسی فاطمه

دوشنده آغلیان گوزوم قاپیمداکی مناظره

سپاه غصّه غفلتاً منی ایدور محاصره

اورکده نقش باغلیوب او فاجعه او خاطره

دوشور خیاله دشمنین هامی جفاسی فاطمه

بجادی روز و شب منیم سرشکیم آخسا دامنه

زمانه ایلدی سنی نشانه تیر دشمنه

نه اولدی دردیوه دوا نه قالدی محسنون منه

الیم بلیمده قالدی ای الیم عصاسی فاطمه

نیه دانشموسان داخی بو رازداره رازیوی

علی اورکده ضبط ایدوب نوای جان گدازیوی

اذان چاقیندا زینبون آچاندا جانمازیوی

گوزیمی آغلادار اونون هر اوخشاماسی فاطمه

منی قوجاتدی اُلماقون، اورکده تاب قالمادی

تعجّبم نیه اجل بو جانی مندن آلمادی

باشون غمی آزالمادی یارالارون ساقالمادی

شماره گَلمدی سنون باشون بلاسی فاطمه

دور ای حبیبه ی خدا منیله سینه داغلیاق

یانقلی آهیلر چکاق، عذاره اشکی باغلیاق

ویراق بو چولده سس سسه حسینه باهم آغلیاق

حسینیمون سولوب یوزی اُلوب آناسی فاطمه

قطا سماده وای دیر چخاندا عرشه وایلاریم

زمانه دن داریخمیشام ایله دونوبدی آیلاریم

سالور جهانی ارزیه نوالریم هرایلاریم

نوالی نیلرین هانی بیله نواسی فاطمه

بو بس دگول که اهل کین اهانت ایتدیلر سنه

بو بس دگول توکولدولر در ولیّ ذوالمنه

گیچنده ایمدی کوچه دن سنی ووران گولر منه

دعا ایله اُلوم داخی دلون فداسی فاطمه

ای عشقباز ممتحن منیمده عشقه خو واریم

کلامیم سیزه گوره یوزومده آبرو واریم

بو درگهه یخلمیشام اورکده آرزو واریم

دوتوبدی پاک دامنون قاپون گداسی فاطمه