اون سگّیز ایل عمر ایتدی دنیاده خانم زهرا

رونق ویروب اسلامه معناده خانم زهرا


اون سگّیز ایل عمر ایتدی دنیاده خانم زهرا

رونق ویروب اسلامه معناده خانم زهرا

عاجزدی قلم یازسون شخصیّت زهرادن

ناپخته وورا بُلمز دم عصمت زهرادن

احیا اولوب آئین حق دولت زهرادن

تاج سر نسواندی تقواده خانم زهرا

مولا ایوینه دوقّوز سنّینده گَلین گَلدی

جان الده ویروب دست جانانه الین گَلدی

خوش گونلری تیز گیچدی، پیکی اجلین گَلدی

قالدی آتاسیز شهر بطحاده خانم زهرا

حالی دیمه زهرانون محزون ندن اولموشدی

آخِر وطن اول زاره بیت الحزن اولموشدی

اوچ دورت گونودی طاها جسمی کفن اولموشدی

یاندی قاپوسی، گَلدی فریاده خانم زهرا

یابن الحسن آزار اشراری دیوم یا یوخ

اخیاره جنایات اغیاری دیوم یا یوخ

ظلم در و دیوار و مسماری دیوم یا یوخ

ایلر دیمَسم شکوه عقباده خانم زهرا

اود شعله سی درگاه خیرالبشره دوشدی

سادات آناسی بین دیوار و دره دوشدی

گَل هارداسان ای فضّه محسن خطره دوشدی

سسلردی کنیزین اول غوغاده خانم زهرا

فضّه گَلنه غنچه گُلدن اوزاق اولموشدی

جان شیشه سی ظلمیله سینموشدی جالانموشدی

کوینک قانا باتموشدی، سینه یارالانموشدی

دوشموشدی یره حال اغماده خانم زهرا

یتمیش نچه گون گیچدی غم داشدی ملال اوسته

شدّتله مریض اولدی اول بانوی دل خسته

گَلدی یاننا بیر گون مولا علی آهسته

محرابه سالوب گوردی سجّاده خانم زهرا

جان قبله سینی گوردی سالموش باشنا سایه

حلّیّت آلوب قویدی باش سینه ی مولایه

باش آچدی ابوالایتام، ایوای دیدی زهرایه

ملحق اولوب آبا و اجداده خانم زهرا

زهرا غمی مولادن آرام و قرار آلدی

آخشام چاقی جان ویردی دفنی گئجیه قالدی

دلده آناوای زینب باشینه قرا سالدی

سسلندی بُلوب گَلمز امداده خانم زینب

دفنینده علی یارین رختین سویا بُلموردی

آغلوردی فراقینده امّا دویا بُلموردی

چون فاطمه نین جسمین قبره قویا بُلموردی

سالموشدی نوا قلب ناشاده خانم زهرا

دل یاندی کلامی بس ویر خاتمه انشاده

بو نوحه ردیفینده سال یحیوینی یاده

یالوار ویره بو شعره پاداش ایکی دنیاده

دنیاده خانم زینب، عقباده خانم زهرا