آتا غمین اورکه سالدی گون به گون سولدی
سارالدی گون یوزی، گیتدی صفاسی زهرانون


آتا غمین اورکه سالدی گون به گون سولدی
سارالدی گون یوزی، گیتدی صفاسی زهرانون
تصوّر ایلیه هر کیمسه حال زهرانی
سزادی آغلیا گوزدن توکه جگر قانی
یتوردی زحمتیله باشه عمر دنیانی
ایله حیات دگلدی سزاسی زهرانون
بو بیر خانمدی که مانندی یوخدی عصمتده
نظیری یر یوزونه گَلمیوبدی عفّتده
بو عصمتیله بو عفّتده بو جلالتده
یاراتمیوبدی بیر عورت خداسی زهرانون
گورنده جدّی که زهرا گَلور دوروب فی الحال
ایدردی نچّه قدم سرعتیله استقبال
دوتوب اَلینده اُپردی اولوردی چوخ خوشحال
دیردی اولسون آتاسی فداسی زهرانون
آتاسینون اُلومی ایله پوزدی پرگارین
شب فراق کیمی تیره ایتدی اسحارین
آپاردی رنگ رخیندن جدانلیق آثارین
خمیده لَندی قد دلرباسی زهرانون
بیر عورت عمر ایده اون سگّیز ایل که دنیاده
نجه اولور اولا قدّی خمیده افتاده
او سنّیله قوجالوق گورسَنوردی زهراده
دگل بیانه گلن ماجراسی زهرانون
حسن حسین تک اوغول، مرتضی کیمی همسر
اوزی جوانه و ریحانه و مَلَک منظر
گورون نقدر مصیبت چکوب اُلوم ایستر
دیر حیاته خدا یوخ رضاسی زهرانون
او آز حیاتیله دویماز نه نوعی دنیادن
او قدر گوردی اذیّت گروه اعدادن
اولوب ایشیق گونوزی تیره لیل یلدادن
گیدوب توانی او غم مبتلاسی زهرانون
فدک گیدوب حسنِینون گُل اوزلری سارالوب
خانم اوزی سن اوزون فکر ایله نه حاله قالوب
قاپی یانوب، بالاسی سقط اولوب، قولی قَرالوب
اُلونجه قالدی قولوندا یاراسی زهرانون
بیر اهل دل تاپا بُلمور خانم دیده دردین
آتا گیدوبدی، عم اوغلی اولوبدی خانه نشین
سالوب خیاله گیچن گونلرین اولوب غمگین
شریک اولا غمینه یوخ آناسی زهرانون
دوتوب یوزین حسنِینه چکردی دلدن آه
دیردی هاردا قالوب بس باباز رسول ا...
نولوبدی گَلموری، حالوزدان اولموری آگاه
رئوفیدی سیزه آخِر آتاسی زهرانون
شهاب اگرچه سراپا غریق عصیان سان
بیر عمر واردی که جرم و خطاده حیران سان
غم ایتمه حضرت زهرایه سن که گریان سان
یتر جزاده سنه چوخ عطاسی زهرانون