تنگ اولدی منیم آغلار گوزیمه ؛سنسیز بو هامی دنیا باباجان

نه نوع دوزوب هجرونده سنون ؛قال آغلاماسین زهرا باباجان


تنگ اولدی منیم آغلار گوزیمه ؛سنسیز بو هامی دنیا باباجان

نه نوع دوزوب هجرونده سنون ؛قال آغلاماسین زهرا باباجان

 

بیر عمر منه هرچند بابا درد و محن غم همدمیدی

آج قالماقیما من یانمازیدیم سن عالمیدون نه عالمیدی

چون سن واریدون غم بولمزیدیم قلبیم خوشیدی دل خرمیدن

نه نوع دوزوم قان آغلامیوم ممکن اولی بو آیا باباجان

 

بوندان سورا کیم سن کیمی منم دلدن آلاجاق درد دیلمی

کیم زایل الدر سن کیمی سانسیز غمیمی حل ایلیاجاق کیم مشکلیمی

ایتموم نجه من سنسیز باباجان زندان بلا اوز منزلیمی

کیم فاطمه نون دردینه یتر احوالین اولور جویا باباجان

 

حقیم بودی بو نعش اوسته یانام تا وار نفسیم فریاد ایلیم

زلفیمی آچام باشیمه ورام افغانه گلم من داد ایلیم

خون دلیمی اشکیمله قاتام اوز چشمیمه بیر امداد ایلیم

بی سر دگل قان آغلاماقیم بو تاله دگل بی جان باباجان

 

سنسیزز بابا جان هر دمه منه هر آنیده مین غوغا یتشور

دنیاده بو غم تقسیم اولونا هر بیر کسه بیر دنیا یتشور

راضی دگلم قالماقینا من از بس ستم اعدا یتشور

قویمور قوروسون دشمن کفنون شرم ایلمیری اعدا باباجان

 

چوخداندی بابا ئولموشدی آنام بیر مدته دین گلمزدی یوزوم

فریاد و فغان همراهیمدی هر شام و سحر آغلاردی گوزوم

بیر عمریده من سنله خوشیدیم سنسیز دایانوم نه قسم دوزم

واردور یری بو دنیانی دوتا گوزیاشیم اولا دریا باباجان

 

یاد اولدی گینه میدان وفا صحرای غم و اندوه و بلا

دوشموش یارالی گل پیکریله قان دجله سنه شاه شهدا

قول باغلو تاپوب بی کس آتانون باشسیز بدنین بیر خرده بالا

سسلردی اویان دور بیر یوخیدان قالدیم نجه گور تنها باباجان